Entama na música a la edá de nueve años, recibiendo clases de gaita del mayestru Vítor Carbajal na Escuela de Música Tradicional "Llacín" de Llanes, cursando per otra parte estudios de solféu y pianu na Escuela Municipal de Música de Llanes.
Nel 2001 entra a formar parte de la Banda de Gaites "Llacín" (Llanes), cola que participa como gaiteru y percusionista na grabación de dos trabayos discográficos, "Tornallás" y "Xideces", asina como en dellos festivales internacionales. Esi mesmu añu entama a recibir clases de vigulín del vigulineru pixuetu Lisardo Prieto (N'arba, Felpeyu).
Nel añu 2004 entama col bouzouki de xeitu autodidacta y al pocu tiempu funda con otros collacios el grupu “Llaeza”.
Pepe ye mayestru especialista en música pola Universidá d'Uviéu y anguaño estudia el Gráu de Musicoloxía.